المحتويات
طريقة عمل الأورجازم في البيت!
لا ينبغي أن يتوقع الشريكان الوصول للأورجازم على السرير دون أن يكونا متفاهمين في حياتهما اليومية. نقدم في هذا المقال وصفة فعالة للوصول للأورجازم، يمكنكما سوياً العمل على إعدادها بخطوات بسيطة
إيه هي الأورجازم؟
هي رد فعل للجسم بيحصل بعد إثارة بعض أجزاء الجسم جنسيًا بالقدر الكافي، وده بيحصل على شكل تقلصات وانقباضات في العضلات المحيطه بالمهبل والرحم، لمدة بتتراوح من 13 لـ51 ثانية، ومع الوصول للأورجازم بيخرج من الجسم هرمونات ونواقل كيميائية تسبب الشعور بالسعادة، ده بالإضافة إن الست كمان بتحس بقمة الشعور بالمتعة الجسدية.
فوائد الأورجازم للنساء
الأورجازم ليها فوايد كتير، منها الصحية ومنها النفسية، زي إنها
- بتساعد على تخفيف الآلام الجسدية.
- بتساعد على تقليل الوزن.
- بتساعد على خفض الضغط العصبي.
- إفراز هرمون الإكسيتوسين أو ما يعرف بهرمون الحب، وهو يساعد على زيادة الترابط بين الشريكين.
- بتساعد على زيادة هرمون التستوستيرون المسؤول عن تحسين الرغبة الجنسية لدى النساء.
- بتساعد على التخلص من السموم الطبيعية في الجسم (الديتوكس) وده بيحسن الهضم.
- بتساعد على الحد من الإصابة بالسرطان وأمراض القلب.
إزاي تقدري توصلي للأورجازم؟
طريقة الوصول للأورجازم بتختلف من ست للتانية، والأورجازم ليها كمان أنواع كتير مختلفة، ممكن الست توصلها أحيانًا عن طريق الخيال، الاسترخاء، أو تحفيز المناطق المثيرة للشهوة الجنسية زي البظر، حلمات الصدر، الـG-spot أو الـ-A spot، وهي عبارة عن دايرة ناعمة من الأنسجة في آخر الجدار الأمامي من المهبل قبل عنق الرحم. وبتستجيب للضغط أو الحركة، مش للمس. وبتتميز أورجازم الـA،G spots بأنها بتكون ممتعة أكتر.
الأورجازم هي واحدة من مراحل دورة الاستجابة الجنسية اللي بتاخد عند الست حوالي ٢٠ دقيقة. وعشان الست توصلها لازم تعدي على المراحل اللي قبلها الأول.
إيه هي مراحل النشوة الجنسية عند المرأة؟
مرحلة الاستثارة
ودي بتحصل عند تحفيز الست جسديًا أو نفسيًا، بيحصل فيها بعض التغيرات الجسدية اللي بتسبب انتفاخ المهبل ورطوبته، وبيزيد فيها معدل ضربات القلب وضغط الدم وسرعة التنفس. والمرحلة دي ممكن تستمر من دقايق لساعات.
مرحلة ثبات الاستثارة
في المرحلة دي بتستمر التغيرات اللي حصلت على الجسم في مرحلة الإثارة وبتزيد شدتها، وساعات بتحصل تشنجات في بعض عضلات الجسم.
مرحلة الأورجازم
المرحلة دي هي ذروة الاستجابة الجنسية وقمة المتعة والإثارة. بتكون أقصر المراحل لأنها بتستمر من 13-51 ثانية بس، وبيحصل فيها تقلصات لا إرادية في عضلات المهبل، بمعدل انقباضة كل 0.8 ثانية. وبيزيد معاها معدل ضغط الدم وسرعة التنفس وضربات القلب للذروة، وبيحصل أحيانًا بعض التشنجات في عضلات القدمين.
مرحلة التراجع أو الاسترخاء
الجسم بيرجع بشكل تدريجي لحالته الطبيعية قبل الإثارة، وفي المرحلة دي الست بتحس بالراحة والحميمية، وأحيانًا الإرهاق. وعلى عكس الرجالة، معظم الستات ممكن تدخل في دورة جنسية تانية لو تم الاستمرار في تحفيزهم.
إيه هي مشاكل الأورجازم؟
الوصول للأورجازم مش حاجة سهلة للست، 40% من الستات بيلاقوا صعوبة إنهم يوصلولها. في بعض الستات مش بيوصلولها لأسباب صحية أو نفسية، لكن النسبة الأكبر من المشاكل بتكون بسبب عدم التحفيز الكافي للأماكن المثيرة للست. ومن أهم الحلول اللي بتساعد على الوصول للأورجازم هي إثارة البظر أو الـGspot.
إيه هي العوامل اللي بتأثر على الأورجازم؟
فيه عوامل كتير بتأثر على الأورجازم، زي مثلاً:
- وجود شريك متفهم لاحتياجات شريكته الجنسية.
- المدة اللي بيتم فيها مداعبة وإثارة الست.
- الحب والحميمية والتفاهم بين الشريكين.
- معتقدات الست عن جسمها وعن الجنس.
- لو الست اتعرضت لإساءات أو لصدمات جنسية.
- غياب التفاهم والتواصل والحوار وكثرة الخلافات بين الشريكين.
- بعض الأدوية مثل أدوية الضغط ومضادات الاكتئاب.
- التوتر والضغط العصبي والاكتئاب.
- المعتقدات الثقافية والدينية التي تجعل المرأة تشعر بالذنب من ممارسة الجنس.
- الإفراط في تناول الكحوليات.
إيه هي المفاهيم الغلط المنتشرة عن الأورجازم؟
التحفيز المهبلي (الاتصال الجنسي) هو الطريقة الوحيدة للوصول للأورجازم
ده ممكن يكون حقيقي عند بعض الستات، لكن بصفة عامة هو مفهوم غلط، لأن النسبة الأكبر من الستات بيوصلو للأورجازم عن طريق إثارة البظر.
- 37% من الستات بيوصلو للأورجازم عن طريق إثارة البظر فقط.
- 36% من الستات بيوصلو للأورجازم عن طريق إثارة البظر مع الاتصال الجنسي.
- 18% من الستات بيوصلولها عن طريق الاتصال الجنسي فقط.
- 9% مش بيوصلوا للأورجازم.
الحياة الجنسية للست بتتدهور مع زيادة السن
ده مفهوم غلط، لأن مع زيادة العمر والخبرة الجنسية، كفاءة الأورجازم بتتحسن، وعدد المرات اللي ممكن تتكرر فيها بتزيد. وده لأن خبرتها الجنسية بتبقى أكبر، ثقتها في نفسها في أوقات ممارسة الجنس بتزيد، وقدرتها إنها تفهم جسمها وتطلب اللي جسمها محتاجه بتزيد. وكمان عشان بتبقى الثقة والحميمية زادت بينها وبين شريكها.
الأورجازم هي الهدف الوحيد من اللقاءات الجنسية
ده مفهوم غلط، لأن كتير من الستات بيلاقوا تجاربهم الجنسية مُرضية ومُمتعة بغض النظر عن الوصول للأورجازم. 9% من الستات مش بيوصلوا للأورجازم لكن فيه منهم بيكونوا سعيدات بممارسة الحب. ولأن متوسط نسبة وصول الست للأورجازم هو 50-70% بس من مرات الممارسات الجنسية.
في النهاية، الرحلة للأورجازم هي تجربة فردية وفريدة جدًا لكل ست، عشان كده متقارنيش نفسك بحد. لكن من المهم جدًا إنك تحاولي تفهمي جسمك أكتر وتعرفي الأوضاع اللي بتساعدك على الوصول لأقصى متعة، وإنك تتكلمي عن احتياجاتك الجنسية بصراحة مع زوجك عشان توصلوا لحياة جنسية سعيدة.