من هي ملكه جمال اللطافه في مصر ويكيبيديا؟

من هو المتهم بخطف ملكة جمال اللطافة في مصر؟

حسب التحقيقات، فقد تبين أنه صديق خطيبها.

اعترافات المتهم بخطف ملكة جمال مصر 

س/ ما قولك فيما هو منسوب اليك من انك متهم باحتجاز المجني عليها بمسكنك دون أمر الحكام او السلطة المختصة بذلك على النحو المبين بالتحقيقات ؟

ج/ محصلش

س/ وما الذي حدث اذا ؟وما تفصيلات الواقعة؟

ج/ اللي حصل انها تبقى صاحبة واحد صاحبي بيشتغل مذيع  وفي علاقة بينه وبينها  وانا كنت شفتها قبل كده ثلاث مرات ، منهم مرة جات هي وصاحبي باتوا عندي، ويوم الجمعة كنت في طيبة مول في مدينة نصر في مهرجان الاذاعة والتلفزيون واللي كان داعيني للمهرجان  هو صاحبي علشان هو اللي كان بيقدم المهرجان، وهناك قابلتها وقعدنا مع بعض وخدنا أرقام بعض وكان معانا بنت اسمها ش.ن  اتعرفت عليها في المهرجان واخدت رقمها  وخلال المهرجان دخلت بنت تانيه ودي تبقى صاحبة صاحبي شوية بيقول انها خطبيته وشوية مديرة أعماله ، و لما خطيبة صاحبي شافتها توترت جدا و ارتبكت و قالت ان كده هيحصل مشكلة لأن الأولى بتقول إنها خطيبة صاحبي ، والتانية بتقول انها خطيبة صاحبي وبعد كده و في نهاية المهرجان ، حصل بينها وبين صاحبي مشكلة علشان راحت بتقوله يا حبيبي، فهو قالها مينفعش الكلام ده هنا وراحت سابت المهرجان ومشيت و انا قعدت مع صاحبي شوية.

انتهاء المهرجان

 وأضاف المتهم أنه بعدها على الساعة 10.00  خطيبة صاحبي كلمتني قالتلي انا عند طريق السويس عند البنزينة شيل اوت اللي في مدخل مدينتي  وراكنة في البطيء و راكبة عربية رينو سوداء و مشغلة الانتظار ، فانا قولتلها انا هجيلك ، واقل من نصف ساعة هبقى عندك ، و لما عديت بوابة الرسوم لطريق السويس كلمتها قالتلي انا واقفة في البنزينة من بره من البطيء ومشغلة الانتظار ، وصلت ومشيت ورايا وروحنا على لابوار كافيه ، و طلبت قهوة بندق وكانت صاحبتها اللي اسمها ش.ن قالتلي ان صاحبتها قالتلها انها بقالها يومين مأكلتش، وبقالها يومين مانمتش ، فجبلتها قهوة بندق وأنا شربت قهوة واكلت سندوتشات بيض من لابوار ومياه 

الذهاب لمنزل المتهم 

 وأوضح المتهم أنه بعد كده خدتها وطلعنا على البيت علشان تبات هناك وأنا اسيب البيت ونزلت اروح ابات عند حد من صحابي ، و لما وصلنا هي ركنت في الباركينج اللي قدام العمارة الناحية الثانية وجابت شنطة هدومها – شنطة هاندي رصاصي – وشنطة تاني خاصة بها صغيرة وطلعت معايا البيت  وقلعت الجزمة واكلت ، ودخلت غيرت هدومها وقلعت الهدوم اللي  كانت لبساها -و دي لونها أخضر  

المرة الأولى لمغادرة منزل المتهم 

وأوضح المتهم انه بعدها بساعة تقريبا نزلنا تاني علشان هي كانت عايزة تشرب قهوة بندق ، وانا معنديش في البيت ، و سابت الشنطة الهاندباج بتاعتها ، وشنطيتها واحنا عند عربيتها قالتلي انها عايزة البالطوا وماخديتش حاجة غير الموبايل والسجاير والجاكيت عندي في العربية و ادتهوني وكانت لابسه البلطو ولبسته ، و روحنا على بنزينة شيل اوت قعدنا هناك حوالي ساعة ، شربنا قهوة و قعدنا في الماستر فوق وبعد كده فنزلنا قعدنا في العربية ، و قعدت تحكيلي على مشكلة بينها و بين صاحبي في نفس الوقت ، و حكيتلي انه نام معاها اكثر من مرة ، وانه وعدها بالجواز ، وانه واخد منها مبلغ مالي ٨٠٠٠ جنيه لان ابوه تعبان وعنده كورونا في المستشفى، وبعدين راسمة ان هي متضايقة منه بسبب أنه هو فصلها في المهرجان وقعد مع واحدة تانيه، وفي الآخر مشي مع واحدة ثالثة خالص، و بعد كده قالتلي هنروح دلوقتي ولا ايه، فقولتلها زي مانتي عايزة، و قولتلها انا هروح اوديكي عند البيت و انزل ثاني.

العودة لمنزل المتهم للمرة الثانية 

وتابع المتهم: فعلا روحنا على البيت على طول و اشترينا سجاير آل أم توت ، الساعة ١:٣٠وطلعنا في الاسانسر ، و دخلنا البيت وقفلنا الباب ، وهي دخلت على الريسبشن على الصالة وانا دخلت غرفة النوم اللي في وش الحمام علشان اغير هدومي ، و لبست ترنج علشان انزل ، و لما طلعت لقيتها في الصالة ، و لما عرفت اني هنزل قالتلي ماينفعش ده بيتك، وانا هبات في الصالة ، انت بات في الاوضة ، فانا قولتلها الكلام ده ميصحش ، خلاص نامي انتي جوه وانا هبات في الصالة ، و استقرينا على كده ، و نمت على الكنبة برة في الجنب اللي ناحية الشباك ، و قعدت معايا عشر دقايق و قالتلي انا هقوم أغير هدومي علشان انام ، و قامت ، وراحت دخلت الاوضه اللي في الوش اللي كان فيها شنطها علشان تغير هدومها ، وأنا كنت قاعد بتفرج على مسلسل. 

بداية العلاقة بين المتهم والضحية

وقال المتهم أنه بعد بنصف ساعة ، حوالي الساعة 3.00 صباحا لقيتها طالعة من الاوضة ولابسه حاجة زي قميص نوم – فوق الركبة و حملتين و مقسم جسمها- وكانت لابسة شبشب حريمي ، بتاع الجماعة عندي ، ولابسة شال بتاعي ، حطاه على جسمها ، و جات قعدت على الكنبة من ناحية الباب بتاع الشقة وربعت على الكنبة ، وولعت سجارة من سجايرها ، وشربتها ، و قعدت تتكلم شوية في موضوع خطيبها عن العلاقة اللي حصلت بينهما وانه معشمها بالجواز ، وأنها مريضة وعندها تعب معين ، وبعد شوية لقيت جسمها بيرتعش من البرد ، فانا قولتلها طيب ماتخشي تنامي او تلبسي حاجة أو شغلي الدفاية ، قالتلي لا أنا هاجي اقعد جنبك تحت البطنية ، فانا طبعا وافقت ، و جات نامت على سيفها الشمال ، وانا كنت نايم برضو على سيفي الشمال ، وهي كانت في ظهري، وقعدت نتكلم شوية في موضوع المشكلة مع خطيبها وانه استغلها ، وأنه استلف منها فلوس ، وأنها هي استلفتها من واحده زميلتها ، و رنت على والدتها علشان تطمنها علشان هتقفل التليفون ، و كانت حوالي الساعة 3.30 ص ولكن والدتها مرديتش ، و بعدين راحت عملت موبايلها اوفلاين ، و سالتني عندك شاحن ايفون ، قولتلها جنبك السلك بتاع الايفون ، و حطيته يشحن ، وعملته اوفلاين ، و بدأت تسألني عن صلتي بخطيبها و ايه مدى العلاقة بينا ، وحكيتلي ان والدتها تعبانة وأن والدها متوفي ، وان اختها ساعدتها ويعني شبه حادين معاها في المعاملة ، و بعد كده سالتني على مراتي و عن اولادي ، وقولتلها ان عندي ولد و بنت وسالتني انا ليه بعيد عن مراتي فقولتلها  بحكم شغلي ، وقالتلي انها كانت شغالة في الطيران المدني ، واتفصلت علشان عندها مرض ما ، و قالتلي انها بتحاول تدور على فرصة تكون مناسبة في التمثيل أو الاذاعة ، و انا اتعدلت على ظهري و هي كانت لسه على سيفها الشمال ونامت على دراعي اليمين ، فلقيتها فتحت سوستت الترنج بتاعي وحطت ايديها على صدري ، وتلعبلي في صدري ، كانت بتقولي انت ازاي جميل كده ، وانا حساك راجل و خطيبي بيشكر فيك وحصل اللي حصل بينا.

 مغادرة المنزل بعد انتهاء العلاقة 

وشرح المتهم أنه بعد ذلك دخلت الحمام على طول وسمعت صوت مياه وانا عدلت نفسي  ونمت على طول علشان كنت تعبان ، و لقيتها على الساعة 8 ص او ٩ ص  بتصحيني و بتقولي . حبيبي انا نازلة عايز حاجة مني ، فقولتلها انتي مش كنتي هتقعدي يوم قالتلي لا ده ماما تعبانة وانا هسافر وهبقى اجيلك تاني و نزلت كانت لابسه اللبس بتاعها اللي كانت طالعة بيه اخر مرة ، بلوفر اصفر ، وفوق منه جاكيت ، و بنطلون جينز ، وماسكه شنطة ظهرها ، و شنطة ثانية في ايدها ، وكانت بتضحك ومفيش حاجة وراحت فتحت باب الشقة بالمفتاح اللي كنت سايبه فيه ونزلت ، و انا كملت نوم ، و لما صحيت على الساعة 4 العصر كلمت واحد صاحبي واخدت بعضي ونزلت و روحت قابلت واحد صاحبي في المرج ، و بعدها بكام يوم بليل لقيت صاحبي بيكلمني وصوته عالي و في نبرة تهديد ، و بيقولي ان خطبته قالتله انها كانت عندي في الشقة ، وسألني اذا كنت نمت معاها ولا لا فانا قولتله لا ، وبعد كدا انا كنت بايت عند واحد صاحبي  في مدينتي ، لقيت الضابط جه خدني على القسم 

س/ وما ظروف نشأتك؟

ج/ انا والدي مزارع ، ووالدتي ست بيت ، وعندي ثلاث اخوات ، و الحمد لله كنا حالنا المادي كويس ، وكنت متربي في قرية وكنت بحفظ قرءان في الكتاب في البلد من وانا في ثالثة ابتدائي ، وكنت القارئ للقرءان بتاع الاذاعة المدرسية في البلد في المدرسة علشان صوتي حلو و بعد كدا سبت البلد بقيت مع والدي في القاهرة ، وكنا مقيمين في عزبة النخل ، وبعد كدا فتحت محل في عام 2011 في التجمع و بعد كده فتحت معرض المفروشات في البلد ، واشتغلت في المقاولات سمسار عقارات.

اعترافات ملكة جمال مصر الضحية 

س/ ما تفصيلات بلاغك ؟

وقالت ملكة جمال مصر في التحقيقات،”اللى حصل إن أنا كنت مدعوة في مهرجان الإذاعة والتليفزيون المصري الذي أقيم بمسرح طيبة مول اللي في مدينة نصر، بصفتي حاصلة على لقب ملكة اللطافة بمسابقة ملكة الأناقة العالمية، ويوم حفل الختام للمهرجان أنا روحت الساعة الخامسة مساء، والمهرجان ده خطيبي مذيع بقناة شهيرة هو اللي كان هيقدم الحفل الختامي، وقابلته أثناء فعاليات المهرجان”.

بداية القصة 

وتابعت”خطيبي كان معاه واحد صاحبه فوقفت معاهم، وسلمنا على بعض، وانا كنت شوفت صاحبه ده قبل كده مع  خطيبي ، وسابنا علشان يشوف شغله ، و فضل لازقلي و قعد يقولي انا عايز اتصور معاكي، واتصور معايا على الريد كاربت ، وبعد كده قالي هاتي ايدك أمسكها عادي فانا مرضيتش و خليت المصورين يمسحوا الصور، وبعد ما قعدنا على الترابيزة ، فجأة واحدة اعرفها من الميديا شافتني في الكافيتريا ، فلقيتها بتطلب تتصور معاي وعلشان انا معرفهاش قوي جات  تسلم عليا وطلبت رقمي فانا مليتها رقم موبايل وفوجئت بصاحب خطيبي بيسجل الرقم كمان و بعتلي رساله وهو كتب الرقم على موبايله ، وبعدين  قولتله انت ليه اخدت رقمي فقالي علشان لو عوزتي حاجة تكلميني في أي وقت فأنا قمت مسحت رقمه وبعد كده  جه خطيبي و ندا علی صاحبه وخده على جنب”.

واستطردت”بعد كده  جالي صاحب خطيبي تاني وقعد يقولي قد ايه هو معاه فلوس وانه دفع لخطيبي فلوس الحلاق هشام ربيع عشان يظبطوا قبل المهرجان وان خطيبي لما اخده على جنب طلب منه الحزام الكلاسيك بتاعه، و بعد كده دخلنا المسرح، وانا قعدت على الكرسي بتاعي في الصف الثاني و بعدين لقيت صاحب خطيبي جه قعد جنبي بعد ما شاور لخطيبى انه يعديه عند كراسي الفي اي بي و جه قالي معلش اصلي معرفش حد غيرك ، فلما خطيبي شافه من على المسرح نزل قالي قربي وقالي هو ليه قعد جنبك قولتله هو اللي جه أنا معرفش ، وبعد كده ندا على صاحبه وقاله مرات اخوك خلي بالك منها، فقاله دي في عنيا، والمهرجان ابتدی و کرموني”.

المهرجان خلص وخطة المتهم بدأت 

وتابعت:”بعد ما المهرجان خلص، طلعت بره و كان معايا بنوته من الميديا وصاحب خطيبي اتعرف عليها، واخد رقمها، و بعدين لقيت صاحب خطيبي قالي هاتي تليفونك، وراح كتب رقمه واتصل بيه، وسألني قالي هو ده رقم غير بتاع الواتس اب علشان انا كلمت الرقم بتاع الواتس اب لقيته مقفول، و قالي أن خطيبي قالي امشيكي بشياكة فحاولت استفهم منه ، فقالي امشي بس دلوقتي وانا هكلمك افهمك.

مغادرة المهرجان 

انا روحت مشیت و اتصلت بخطيبي، لقيت موبايله مقفول ، واخدت عربيتي و بنت الميديا علشان اوصلها ، ووصلتها محطة مترو كلية البنات ، وانا بوصلها لقيت صاحب خطيبي بيتصل بيا ، ورديت عليه فسألني عن مكاني ، وهروح فين ، فقولتله انا راجعة الزقازيق ، فسألني هروح الزقازيق منين، ولما عرف اني برجع من طريق السويس طلب مني اني استناه عند البنزينة اللي بعد البوابة على طول على اليمين، و استفسرت عن السبب اللي عايز يقابلني بسببه فقالي ان خطيبي في مشكلة كبيرة و مصيبه وانه هيحكيلي لما يشوفني وقعد يتابع معايا وانا في الطريق لحد ما عديت الكارته – بوابة تحصيل الرسوم – لقيته كلمني قالي انا شوفت عربيتك اقفي على جنب ، فعدى جنبي وقالي امشي ورايا.

بداية اللقاء أمام شقته 

وأكدت في تحقيقات النيابة،”نزل من العربية و قالي تعالي نقعد جوه فالمكان كان مقفول، راح قالي انا اعرف الناس اللي هنا كلها ودخلنا وجابلي قهوة ، وقعدنا ، وسألته في ايه ، راح قالي ان موبايله فصل ، فقالي تعالي نروح على البيت زي ما خطيبك قالي فانا رفضت، وهو قالي أن خطيبي  قاله يكلمني ويخليها تسبقني على البيت وقالي ان خطيبي زمانه وصل على البيت فروحت معاه ولما وصلت عملت تحديث للعنوان و بعت لنفسي لوكيشين وفضلت قاعدة في العربية، ولقيت صاحب خطيبي بيقلي ان النور والع قولتله هو خطيبي معاه المفتاح فقالي ايوه، فقولتله انا هكلمه ، ولقيت موبايله لسه مقفول ، فقالي اكيد ماشحنهوش او اخد الواصلة البايظه اللي معاه ، فنزلت من العربية بصيت على عربية خطيبي ملقيتهاش، فقولتله امال فين عربيته قالي هتلاقيه راكنها بعيد، وهو كمان ركن بعيد فسألته ليه قالي علشان محدش من اصحابنا يعرف ان احنا هنا ، فقولتله خلاص اطلع انت واديني خطيبي على التليفون وانا اطلع ، راح قالي حاضر و دخل العمارة غاب خمس دقايق و جه قالي أن خطيبي لسه مجاش، وقالي اطلعي استنيه احسن ، فانا رفضت، وقولتله انا هستنى خطيبي في بنزينة شيل اوت اللي بعد البوابات بتاعة كارفور ولما  ييجي بلغه، وروحت اركب عربيتي لقيتها عطلت مش بتدور، فرحت معاه بعربيته على هناك، ودخلنا محل ماستر و شربنا قهوة”.

التخطيط لإيقاع الضحية 

وتابعت: “خلال الوقت ده طلع عمل مكالمة ورجع قالي محمد وصل البيت وموبايله فصل على طول يلا نروحله ، و قعدت احاول اكلمه ولكن موبايله مقفول ، وقولتله اطلع و اديني خطيبي على التليفون ، فطلع ونزل قالي ان خطيبك تعبان وصمم اني اطلع وقعد يقولي انا اصلا حسيبكم لوحدكم وهروح انا الرحاب، وفي الاخر وبعد تردد طلعت، فتح الباب فدخل ونادي علي خطيبي وردد خطيبتك جت، فقولتله انده فقالي ما تخشي بقى.

دخول الضحية إلى منزل المتهم 

وأوضحت،” بعدها لقيته زقنى جوه الشقة، وقفل الباب بالمفتاح و شال المفتاح في جيبه، فانا خوفت و قولتله هو خطيبي فين قالي خطيبك مش جاي اصلا، وقالي بالزوق كده لحد ما اخش اعلق الجاكيت اقلعي جزمتك بالزوق و اقعدي بدل ماجي اقلعها لك بالعافية فجريت على باب الشقة و قولتله افتح علشان ماعملكش مصيبة ، قالي لو قعدتي تصوتي من هنا للصبح محدش هيلحقك، فروحت حاولت اتصل بحد بالتليفون علشان ينجدني راح اخد مني التليفون و ضربني بالقلم ووقعني على الكنبة ، و جه بعد كده قالي انا اسف ،انا ازاي عملت كده و قرب مني و حط ايده على شعري و قعد يبوس على شعري و يتأسف ، و قالي انا مش هعملك حاجة و قالي تعالي نلعب لعبة، واداني تليفوني و فاتحه بالعافية و قالي نتكلم واتس اب احسن ، لقيته باعتلي على الواتساب انا زعلان منك ، فقلت له بصوتي ليه فقالي كلميني على الوتس آب أحسن ، فكتبت له ليه  فقالي انتي عارفة! 

محاولة الضحية الهروب 

وتابعت:”طلعت من الشات علشان أحوال اكلم حد فسحب مني التليفون وقالي مش أنا قلت لك متكلميش حد وشدني من شعري وقالي أنتي واضح انك عاوزة اتعامل معاكي بالعنف فقلت له هلم عليك الناس و على البلكونة وحاولت افتحها فشدني من شعري ووقعني على الارض وشالني وحطني على الكنبة وقلعني الجزمة وقالي ان تليفون صاحبك اتفتح خلينا نشوف هو فين وعمل التليفون بتاعي وضع طيران  وكلم خطيبي قاله انت فين  فقله وصلت الرحاب مع صاحبتي قاله تمام وقفلوا المكالمة.

إرغام وتهديد الضحية 

وأكدت” المتهم قالي :”أنا هولع جب سيجارة حشيش ” فقلت له انا مش بشرب أنا عندي مزق على الرئة فقالي انتي مبتشربيش فقلت له انا بشرب سجاير خفيفة وانا مش عايزة اشرب خالص فقالي ايوه واضح انك مش بتشربي بس أنتي بالعافية هتشربي، فجابني من شعري وحاول يحط السيجارة دي في بقى وانا مرضتش فراح ضربني بالقلم على وشي وكتفيني ودخلني على الأوضة.

قرار الإبلاغ عن الواقعة 

 قعدت مترددة ابلغ ولا لاء علشان أهلي وسمعتي وكمان والدتي تعبانة وبعد كده رحت على القسم امبارح فقالوا تعالي النهارده وأنا إمبارح برضوا كلمت منظمة المرأة ورحت ليهم الساعة التاسعة الصبح وبلغت هناك باللي حصل.

جاء بأمر الإحالة أن المتهم صاحب معرض مفروشات ومراتب وسمسار خطف بالتحايل المجني عليها  ن. ع  مضيفة طيران وملكة جمال مصر بأن أوهمها بانتظار أحد أصدقائها خطيبها والذي يعمل إعلاميا بإحدى القنوات ومقدم مهرجان شهير بالإذاعة والتليفزيون بمحل سكنه لحل الخلافات التي نشبت فيما بينهما فأمنت له واستدرجها إلي مسكنه وما إن وصلا حتى اقتادها عنوة وأوصد الباب قاصدا من ذلك إبعادها عن أعين الناس واحتجزها في ذلك المكان لعدة ساعات ولم يطلق سراحها إلا عقب ارتكابه جريمته.